أسرار الفطار الصحي في رمضان "كيف تتجنبي الخمول بعد الفطار .

صايمة طول اليوم وتعبانة في المطبخ بتجهزي أحلى فطار وبعد الأذان تآكلي وتلاقي نفسك "تكاسلتي" ومش قادرة تقومي من مكانك؟ خمول ودماغك تقيلة وصداع؟ صح؟!

لكي تحل هذه المشكلة .. لابد الأول نفهم جسمنا ماذا يفعل وقت الفطار:

- طول نهار رمضان جهازك الهضمي مريح جداً مفيش مجهود وسكر الدم والأنسولين مستقرين في أهدى حالاتهم.
- وفجأة.. تضربي وجبة تقيلة وحلويات وعصاير! ده بيعمل صدمة لجسمك بالمعنى الحرفي:
   - سكر الدم يضرب في السما فجأة فالبنكرياس يفرز أنسولين بكمية كبيرة وقوية عشان يلحق الموقف.
   - فالجلوكوز يدخل الخلايا بسرعة جداً فيحصلك انخفاض مفاجئ في السكر وهنا بتبدأي تنامي على نفسك!
   - المعدة اللي كانت مريحة طول اليوم فجأة بقى مطلوب منها تهضم كل ده فالدم بيروح أكتر للمعدة والأمعاء ويقل الدم والأكسجين اللي رايح للمخ والعضلات يعني برده كسل وخمول
   - قلة شرب المية طول النهار بتقلل كفاءة الدورة الدموية ده غير لخبطة النوم في رمضان اللي بتعلي هرمونات التوتر

الخلاصة؟ كل الأسباب دي بتتجمع عشان تخليكي عايزة تفضلي قاعدة في مكانك ماتتحركيش!

بعد ما فهمنا المشكلة.. الحل بسيط جداً وموجود في السنة النبوية:

1. اكسري صيامك بذكاء: كوباية مية (بلاش تكون متلجة) مع تمرة أو تلاتة بالكتير.
2. قومي صلي المغرب. الـ 10 دقايق دول بيدوا فرصة لمعدتك تستعد وللأنسولين إنه يترفع بهدوء.
3. ابدأي فطارك بحاجة دافية زي شوربة خضار أو عدس.
4. كملي فطارك من غير ما تملي بطنك للآخر.
5. الحلويات بالعقل ما تكتريش وخليها بعد الفطور ولو تقدري بلاش تاكلي كل حاجة في نفس التوقيت قسمي فطارك على مرتين وخدي وجبة تانية بعد التراويح.

لو بتعملي دايت ومهتمة بنزول وزنك في رمضان فأكيد إنتي عارفة إن تظبيط الكميات وتوقيت الأكل هو الأساس.